Lidhje

OKB: Jo takim Obama-Rouhani


Zyrtarët amerikanë thonë se Presidenti Barack Obama dhe Presidenti iranian Hassan Rouhani nuk do të mbajnë një takim historik në Nju Jork, ku po zhvillon punimet Asambleja e Përgjithshme e OKB-së.

Zyrtarët thanë se një takim i mundshëm do të ishte tepër i komplikuar për delegacionin iranian.

Ndërsa nuk është planifikuar ndonjë takim mes të dy udhëheqësve, zyrtarët amerikanë nuk e kanë përjashtuar mundësinë e një takimi të rastësishëm, ose thjesht një shtrëngim duarsh.

Udhëheqësit amerikanë dhe ata iranianë nuk janë takuar më pas revolucionit islamik të vitit 1979, që rrëzoi nga pushteti Shahun, të mbështetur nga Shtetet e Bashkuara.

Zoti Rouhani është në plan të flasë para Asamblesë së Përgjithshme të martën. Të hënën ai u bëri thirrje udhëheqësve botërorë për ta angazhuar Iranin dhe për të zbutur sanksionet e dhimbshme ekonomike kundër vendit të tij.

Presidenti Obama tha se Irani duhet të ndërmarrë veprime transparente dhe të verifikueshme për t'u dhënë fund dyshimeve të ndërkombëtare lidhur me programin e tij bërthamor. Në fjalimin që mbajti sot përpara Asamblesë së Përgjithshme të Kombeve të Bashkuara në Nju Jork, zoti Obama bëri thirrje për "pasoja" lidhur me përdorimin e armëve kimike nga regjimi sirian i Presidentit Asad.

Presidenti Barak Obama tha se Shtetet e Bashkuara do të ndërmarrin veprime të drejtpërdrejta, kur është e nevojshme për t'u mbrojtur nga sulmet terroriste.
Ai tha se do të përdorë të gjithë elementet e fuqisë amerikane, duke përfshirë forcën ushtarake, për të siguruar interesat amerikane në Lindjen e Mesme.

Presidenti Obama kërkoi që përdorimi i armëve kimike në Siri apo gjetkë të mos kalojë pa pasoja. Zoti Obama tha se reagimi botëror lidhur me përdorimin e armëve kimike nga Siria ka qenë tepër i dobët dhe i bëri thirrje Këshillit të Sigurimit të miratojë një rezolutë të detyrueshme për t'u zbatuar mbi bazën e marrëveshjes mes Shteteve të Bashkuara dhe Rusisë për të vënë armët e Sirisë nën kontrollin ndërkombëtar për t'i asgjësuar më vonë. Përndryshe, paralajmëroi ai, besueshmëria e botës do të rrezikohej.

Në fjalimin e hapjes së asamblesë vjetore të OKB-së, Sekretari i Përgjithshëm, Ban Ki Moon u bëri thirrje udhëheqësve botërorë të ndalin dërgimin e armëve në Siri.
Presidenti Obama tha se është në interesin e SHBA ta shohin Lindjen e mesme dhe Afrikën e Veriut në paqe. Por këto, tha ai, nuk mund të arrihen me veprime të njëanshme sidomos me veprime ushtarake të njëanshme. Përpjekjet diplomatike amerikane, tha Presidenti Obama, do të përqendrohen në dy çështje – armët bërthamore të Iranit dhe paqja mes Izraelit dhe palestinezëve.

Lidhur me programin bërthamor të Iranit, ai tha se Teherani duhet të ndërmarrë veprime transparente dhe të verifikueshme për t'u dhënë fund dyshimeve të ndërkombëtare lidhur me programin e tij bërthamor.

Nëse zgjidhet çështja bërthamore, tha Presidenti Obama, kjo mund të çojë në përmirësimin e marrëdhënieve me Iranin. SHBA parapëlqejnë që çështja të zgjidhet në mënyrë paqësore. Por fjalët për pajtim duhet të shoqërohen me veprime të verifikueshme, tha zoti Obama.

Trego komentet

XS
SM
MD
LG