Në Kosovë, po vazhdojnë diskutimet për procesin e formimit të qeverisë së re pas zgjedhjeve të parakohshme parlamentare të 8 qershorit, ndonëse ende pritet vendimi i Gjykatës Kushtetuese lidhur me kërkesat e presidentes Atifete Jahjaga për qartësimin e rolit të saj në këtë proces.
Debatet janë përqendruar rreth asaj se kush mund të krijojë qeverinë, Partia Demokratike që doli e para me mbi 30 për qind të votave, apo partitë pasuese që pretendojnë së bashku shumicën në parlament.