Të gjithë pjesëmarrësit në konferencën për Sidën këtë vit, bien dakord me një objektiv themelor: çrrënjosjen e virusit vdekjeprurës. Por siç njofton nga Melburni i Australisë, korrespondentja e Zërit të Amerikës, Anita Powell ekspertët dhe aktivistët kanë këndvështrime shumë të ndryshme se si ta arrijnë këtë objektiv.
Sida quhet shpesh sëmundja më e zgjuar në botë. Kur zë vend në trupin e njeriut, retrovirusi me nëntë gene shumëfishohet me një shpejtësi marramendëse e megjithatë ndryshon formë menjëherë kurdo që sistemi imunitar përpiqet ta sfidojë.
Virusi, i cili nën mikroskop duket si një top me gjemba, u ka shpëtuar disa prej shkencëtarëve më të mëdhenj të botës, që ende nuk kanë gjetur një kurë mbi 30 vjet pasi virusi u zbulua për herë të parë. Organizata e OKB-së për Sidën thotë se që atëherë Sida ka shkaktuar vdekjen e 39 milionë vetëve në gjithë botën.
Prandaj, ndërsa rreth 12,000 delegatë, mes së cilëve shkencëtarë, aktivistë dhe njerëz të prekur nga virusi HIV ose Sida, janë mbledhur këtë javë në Melburn, gjithkush duket se ka një plan të ndryshëm për neutralizimin e virusit që godet nga shumë drejtime.
Shumë vetë, si për shembull Nagat Elhadi i Shoqatës sudaneze për Planifikim familjar, kanë një urim të thjeshtë për konferencën.
“Të mos kemi infektime të reja nga HIV. Të gjithë shkencëtarët të punojnë së bashku për të ndërprerë infeksionet e reja”.
Te tjerë si kreu i UNAIDS, Michel Sidibe, kanë një plan të detajuar hap pas hapi, të cilën ai e prezantoi në ceremoninë e hapjes së konferencës.
“Vizioni im për t’i dhënë fund Sidës është ky: Analiza me vullnet të lirë, trajtimi të vihet në dispozicion të gjithkujt dhe kudo. Cdo person me HIV duhet të ketë në dispozicion trajtime anti-retrovirale. Të mos ketë më të vdekur nga Sida, apo të lindur me HIV. Ata që janë të prekur nga HIV, të jetojnë me dinjitet, të mbrojtur nga ligji dhe të lirë të shkojnë ku të duan në botë”. ((applause))
Por sic theksojnë shumë aktivistë, mjekësia nuk është i vetmi faktor. Shoqëria luan një rol të fuqishëm në luftën kundër Sidës, veçanërisht në shoqëritë ku homoseksualët paragjykohen dhe penalizohen. Kjo konferencë i ka vënë theks të veçantë kësaj çështjeje, ne deklaratën e saj, duke bërë thirrje që t’i jepet fund diskriminimit ndaj atyre që janë ndryshe.
Abhina Aher është një prej tyre. Ajo ka lindur mashkull, por tani jeton si një person që nuk është as plotësisht mashkull as femër në vendin e saj Indi, por publikisht identifikohet si femër. Meqenëse, njerëzit si ajo diskriminohen, thotë ajo, ata shpesh detyrohen të shiten seksualisht, për të mbijetuar, gjë që e rrit jashtëzakonisht rrezikun e prekjes nga Sida.
Ajo thotë se sheh një hendek të thellë në shërbimet mjekësore. Nëse një person është aq shumë në depresion saqë për të nuk ka rëndësi nëse jeton apo vdes, si mund të mbrohet ai nga Sida, pyet ajo.
“Përparësia ime nuk është HIV-i. :Përparësia ime është feminizimi, mbështetja sociale, shëndeti mendor. Kur harton një program për HIV-in, nuk mund t’i përjashtosh këta elementë”.
Studiuesja Kylie Johnston, e Qendrës Studimore australiane për Seksualitetin, Shëndetin dhe Shoqërinë, është dakord.
“Mendoj se gjëja më e rëndësishme për mua është që komuniteti ynë të mos përqendrohet vetëm tek aspekti bio-mjekësor. Nuk duhet që ta fokusojmë vëmendjen vetëm tek shkenca, entuziazmi për kurën dhe trajtimi parandalues, por duhet të mos harrojmë që komuniteti duhet të luajë një rol të rëndësishëm”.
Sot, në ditën e parë të plotë të konferencës, janë planifikuar 87 aktivitete të ndryshme, pa përfshirë ekspozitat.
Eshtë një aktivitet intensiv, sidomos po të kesh parasysh se diku mes këtij kapaciteti të jashtëzakonshëm mendor, mund të jetë kura që gjithkush shpreson të gjendet.