Njohës të integrimeve evropiane thonë se dukuria e migrimit të paligjshëm e dëmton seriozisht procesin e liberalizimit të vizave me Bashkimin Evropian. Ata thonë se këto migrime nxjerrin në pah edhe problemet e brendshme me të cilat përballet Kosova. Shtimi i numrit të emigrantëve të paligjshëm drejt vendeve të Bashkimit Evropian ka nxitur debate në Kosovë për shkaqet e përpjekjeve të tilla. Autoritetet vendase e ndërkombëtare në Kosovë po bëjnë thirrje kundër emigrimeve të paligjshme dhe kanë paralajmëruar masa të rrepta ndaj grupeve dhe individëve që mund të jenë të përfshirë në trafikun e emigrantëve.