Lidhje

Ukrainë: Bie intensiteti i luftimeve


Ushtria e Ukrainës njoftoi për të dytën ditë me radhë një rënie të dukshme të sulmeve nga rebelët pro-rusë, por thotë se armëpushimi ende nuk është zbatuar në Ukrainën lindore.

Rebelët ndërmorrën 19 sulme ndaj territorit të kontrolluar nga qeveria dhe objektivave të saj gjatë një periudhe 24 orëshe, sipas një deklerate në Facebook nga qendra e shtypit për ushtrinë e Kievit. Të martën, rebelët filluan tërheqjen e armatimeve të renda nga linjat e frontit, siç kërkohet nga një armëpushim i ndërmjetësuar nga ndërkombëtarët që ishte caktuar të futej në efekt me 15 shkurt.

Qeveria e Ukrainës ka thënë se nuk do të tërheqë armët e saj derisa të ndalen plotësisht sulmet e rebelëve. Kievi thotë se po respekton rregullat e armëpushimit, por rezervon të drejtën për tu kundërpërgjigjur.

Ministrat e jashtëm të Rusisë, Ukrainës, Gjermanisë dhe Francës u takuan të martën në Paris por nuk u pajtuan se kush e kishte fajin për shkeljen e armëpushimit.

Ndërkohë, presidenti rus Vladimir Putin paralajmëroi sot se Rusia do t’ja ndërpresë furnizimin me gaz Ukrainës, në se Moska nuk merr paraprakisht pagesën nga Kievi.

Duke folur para gazetarëve në rezidencën presidenciale Novo-Ogaraevo, në periferi të Moskës, pas takimit me presidentin e Qipros Nicos Anastasiades, zoti Putin këmbënguli se Ukraina kishte marrë parapagesë për të mbuluar vetëm 3-4 ditë dërgesa gazi dhe se pa parapagesa të tjera, kompania gjigande e gazit e kontrolluar nga shteti, Gazprom, do ta ndërpriste furnizimin me gaz të Ukrainës. “Natyrisht, që kjo mund të rrezikojë kalimin e gazit tek partnerët tanë evropianë”, - tha Presidenti rus, duke shtuar se shpresonte që nuk do të vinte puna deri aty.

XS
SM
MD
LG