Lidhje

Referendumi në Greqi


Grekët po votojnë në referendum nëse do të pranojnë masat shtrënguese për një shpëtim financiar nga Bashkimi Evropian, që parashikon shkurtime të mëtejshme të shpenzimeve. Qeveria greke i ka bërë thirrje popullit të votojë kundër, por zyrtarët e BE-së paralajmërojnë se kjo mund të çojë në daljen e Greqisë nga Eurozona.

Mes brohoritjeve të mbështetësve, Kryeministri Tsipras shkoi të hedhë votën e tij në një rrethinë të kryeqytetit. Në një ditë llogarish për Greqinë, ai përdori një ton optimist.

“Sot demokracia triumfon mbi frikën dhe shantazhin. Vendosmëria e njerëzve tanë e mposht propagandën e frikës. Jam i sigurtë se që nesër hapim rrugën për një rikthim në vlerat themelore të Evropës.”

Votuesit grekë duhet të zgjedhin mes garancive të kryeministrit se kjo është thjesht pjesë e një loje me Evropën, dhe paralajmërimeve nga Brukseli se një votë ‘jo’ mund të nxirrte Greqinë nga Euro.

Ndër radhët e votuesve, shumë shprehën frikën për pasojat nëse Greqia do të refuzonte ofertën e Evropës.

“Kam dy fëmijë të vegjël dhe unë jam e shqetësuar për të ardhmen e tyre. Megjithatë jam e gatshme të sakrifikoj më tej që Greqia ta kalojë krizën dhe të ketë një cilësi më të mirë jetese.”

Por, fushata ‘jo’ thotë se paralajmërimet e Brukselit për një dalje të Greqisë nga Eurozona janë thjesht një tjetër bllof.

“Vullneti demokratik i popujve të Evropës duhet të pranohet.”

Anketat tregojnë se grekët janë të ndarë mbi rrugën e së ardhmes për vendin e tyre. Por kjo votë jo vetëm që do të vendosë të ardhmen e Greqisë – por do të ketë jehonë në Evropë dhe më tej.

XS
SM
MD
LG