Lidhje

Tremujori II, ekonomia rritet 2,53%


Instat publikon të dhënat. Rritjen më të madhe sektori i Ndërtimit, ndërsa Bujqësia shënon një rënie të lehtë

Në Shqipëri, Instituti i Statistikave njoftoi sot se ekonomia shënoi një rritje prej 2,53 përqind në tremujorin e dytë, duke qëndruar në këtë mënyrë brenda pritshmërive për Prodhimin e Brendshëm Bruto gjatë vitit 2015

"Kontributin kryesor në këtë rritje e kanë dhënë degët e ekonomisë si Ndërtimi me 1,96 pikë përqindje, Industria, Energjia dhe Uji me 0,72 pikë përqindje, Administrata publike, Arsimi dhe Shëndetësia me 0,46 pikë përqindje, Tregti Hotele dhe Restorante dhe Transporti me 0,15 pikë përqindje, Aktivitetet financiare dhe të Sigurimit me 0,08 pikë përqindje, Pasuritë e paluajtshme me 0,03 pikë përqindje, Informacioni dhe Komunikacioni me 0,01 pikë përqindje”, shpjegoi Gjergji Mano, drejtor në INSTAT.

Sipas Institutit të Statistikave degë të tjera të ekonomisë kanë dhënë një kontribut negativ, ku bie në sy Bujqësia, Pyjet dhe Peshkimi me -0,16 pikë përqindje. Ky sektor shënoi një rënie prej 0.76 përqind, ndonëse në tremujorin e parë të vitit, pavarësisht përmbytjeve, pati një rritje të aktivitetit të tij.

Sipas të dhënave, sektori më rritjen më të madhe ka qenë Ndërtimi me 24,49 përqind, i pasuar nga Grupi i Industrisë, Energjisë dhe Ujit me 6,28 %, ndërkohë që sektorët e tjerë kanë patur një rritje modeste.

Sipas të dhënave të sotme të INSTAT-it, konsumi i popullatës ka shënuar një rënie prej 3.16 përqind gjatë tremujorit të dytë.

Për vitin 2015, pritshmëritë janë për një rritje në nivelet e 2.7 përqind, ose 0,3 pikë përqindje më e ulët se parashikimi fillestar i autoriteteve.

Trego komentet

XS
SM
MD
LG