Shtetet e Bashkuara kanë liruar nga burgu i Guantanamos shtetasin e fundit britanik të ndaluar për aktivitet apo mbështetje të terrorizmit.
Sekretari i Jashtëm britanik Philip Hammond tha sot se Shakir Amer, me origjinë nga Arabia Saudite është liruar dhe do të mbërrijë sot në Britani.
Amer është mbajtur në Guantanamo që nga viti 2002, por ndaj tij nuk janë ngritur kurrë akuza dhe nuk është nxjerrë në gjyq.
Ai u ndalua në Afganistan në vitin 2001. Autoritetet amerikane e ndaluan nën dyshimet se kishte udhëhequr një njësi të talebanëve dhe se ishte takuar me Osama bin Laden. Por Amer këmbëngulte se kishte qenë në Afganistan me familjen për aktivitet bamirës.