Lidhje

Lirimi i të burgosurve në Amerikë


Të martën, 46 shkelës jo të dhunshëm të ligjit për drogën do të falenderojnë presidentin Barack Obama për lirimin e tyre. Ai do të shkurtojë dënimin e tyre si pjesë e përpjekjeve për të reformuar sistemin e drejtësisë kriminale në Shtetet e Bashkuara. Presidenti Obama ka ndryshuar më shumë dënime me burg sesa çdo president tjetër që nga Lyndon Johnson në vitet 1960.

Barbra Scrivner vazhdon të zgjohet në 5 të mëngjesit. Është kohë e qetë për të menduar çfarë ka dhe çfarë ka humbur. Këto ditë, ajo ndihmon të kujdeset për nipin – e përgatit për të shkuar në shkollë çdo ditë.

"Është si nata me ditën. Tani kam një jetë normale."

Scrivner bëri 21 vjet burg për konspiracion për drogën. Vajza dhe nipi i saj filluan ta njohin gjatë ditëve të vizitave. Ajo u lirua para kohe këtë vit pasi presidenti Obama i shkroi Scrivnerit këtë letë, ku ulte dënimin e saj.

"Kujto se ke aftësinë për të bërë zgjedhje të mira në jetë."

46 të burgosur të tjerë do të lirohen sot. Scrivner e di problemin me të cilin ata përballen.

"Është përpjekje e madhe. Është shumë e vështirë nëse ke qënë në burg për shumë vite pasi çdo gjë këtu jashtë ka ndryshuar. Duhet të mësosh si ta jetosh jetën në këtë botë."

Trashëgimia e një presidenti varet nga suksesi i tij. Me ndryshimet në ligjet e dënimit, më shumë se 6 mijë të burgosur do të lirohen para se ai të largohet nga posti.

Gjykatësi Ancer Haggerty e dënoi zonjën Scrivner me 30 vjet. Ai tani ka dalë në pension. Por në atë kohë, Haggerty nuk mund ta ulte dënimin e saj për shkak të rregullave për dënimet minimale të detyrueshme.

"Mendimi i përgjithshëm ishte të barazoheshin dënimet në mbarë vendin dhe prandaj u vendos minimumi i detyrueshëm. Por kam qënë gjithmonë i mendimit se disa prej dënimeve ishin tepër të rënda. "

I kërkuam zonjës Scrivner të na çonte në vendin ku jetonte me vajzën e saj para se të arrestohej. Ajo nuk ka qënë aty prej 22 vjetësh.

"Këtu mendova se po filloja një jetë të re. Dhe pastaj çdo gjë u përmbys dhe mori fund duke marrë edhe jetën time. "

Tani ajo ka shansin për të filluar një jetë tjetër.

XS
SM
MD
LG