Lidhje

Rezultatet në Ajoua 2016


Cruz, Clinton, Sanders

Cruz, Clinton, Sanders

Senatori Ted Cruz ishte fituesi i zgjedhjeve paraprake presidenciale republikane në Iowa, në provën e parë zyrtare të fushatës presidenciale. Por gara e demokratëve mes Hillary Clinton dhe sfiduesit Bernie Sanders përfundoi në barazim duke sugjeruar një betejë të gjatë përpara. Cruz kishte pas në një distancë të vogël miliarderin Donald Trump dhe senatorin nga Florida Marco Rubio, i cili u paraqit mjaft mire dhe që mund ta shjfrytëzojë këtë për garat e ardhshme.

Senatori i Teksasit Ted Cruz, një politikan konservator, doli mbi kandidatët e shumtë republikanë dhe shpalli fitoren.

“Sonte është një fitore për bazën. Sot është një fitore për konservatorët kurajozë në mbarë Ajouën dhe në pjesë të tjera të vendit. Sonte shteti i Ajouës tha fjalën e tij.”

Donald Trump, që kryesoi garën për muaj me rradhë, doli i dyti dhe premtoi të fitojë në betejën tjetër, atë në Nju Hemshër.

“Unë do të jem kandidati republikan dhe do ta kemi më të lehtë të mposhtim Hillary-n apo Bernie-n apo këdo që do të na dalë përpara!”

Senatori i Floridas Marco Rubio u radhit i treti, çuditërisht menjëherë pas Trumpit, duke dalë ndoshta si kandidati më favorit nga republikanët.

“Sonte këtu në Ajoua njerëzit dërguan një mesazh shumë të qartë. Pas shtatë vjetësh me Barack Obamën, ne nuk do të presim më gjatë për ta marrë drejtimin e vendit!”

Republikanët morën pjesë në shifra rekord në këto zgjedhje, si këtu në këtë qendër. ku Sheila Waller mbështeti Marco Rubion.

“Mendoj se ai është më i përshtatshmi, shumë i edukuar dhe shumë i zgjuar për politikën e jashtme. Mendoj se këto cilësi e bëjnë atë shumë tërheqës.”

Gara mes demokratëve ishte shumë e ngushtë mes Hillary Clinton-it dhe Bernie Sanders-it. Por Clinton u shpreh sikur të kishte fituar.

“Një natë e paharruar. Një fushatë e shkëlqyer. Ka qënë një nder i madh të bëja fushatë në mbarë Ajouën me shumë prej jush, për të parashtruar të ardhmen e partisë demokrate dhe të Shteteve të Bashkuara të Amerikës.”

Sanders gjithashtu shpalli fitore, i rrethuar nga votuesit e rinj që mbështesin mesazhin e tij për ekonominë. Ai është i gatshëm të shkojë në Nju Hemshër ku kryeson ndjeshëm ndaj zonjës Clinton.

“Me krizat që po përballet vendi, është vonë për politikën dhe ekonominë tradicionale.”

Demokratët që morrën pjesë në votime ishin gjithashtu të shumtë. Në Des Moines, përkrahësit e Sanders-it dhe Clinton-it mezi prisnin të votonin.

“Ai ka ide të reja në procesin politik.”

“Ajo do të jetë kandidatja më e fortë për të vazhduar rrugën e Barack Obamës dhe për të punuar me Kongresin për të ecur përpara.”

Demokrati Martin O'Malley dhe republikani Mike Huckabee i ndërprenë fushatat e tyre pas rezultatit të dobët në Ajoua. Të tjerët po bëhen gati për garën në Nju Hemshër të martën e ardhshme.

Trego komentet

XS
SM
MD
LG