Lidhje

Reforma në Drejtësi në kalendarin e parlamentit


Ndryshimet kushtetuese në programin trejavor të muajit korrik. Debate në konferencën e kryetarëve të grupeve dhe për 7 projektligjet që shoqërojnë Reformën

Në Shqipëri, ndryshimet kushtetuese të parashikuara nga Reforma në Drejtësi janë përfshirë në kalendarin tre javor të punimeve të parlamentit në muajin korrik. Në konferencën e Kryetarëve të grupeve parlamentare, ku u diskutua çështja e kalendarit pati sërish përplasje mes shumicës dhe opozitës. Kjo e fundit këmbëngul në arritjen më parë të një dakortësie për pikën e vetme të mbetur pezull, atë të formulës së emërimeve nga ana e parlamentit të anëtarëve të disa prej institucioneve të sistemit të Drejtësisë.

Po ashtu, mosmarrëveshje gjatë mbledhjes pati edhe lidhur me kërkesën për përfshirjen po në rend të ditës së 7 projektligjeve që duhet të shoqërojnë Reformën në Drejtësi, për të mundësuar një zbatim sa më të shpejtë të saj. Vendimi përfundimtar pritet të merret në fund të seancës së sotme të parlamentit, ku kalendari trejavor do të hidhet në votim, ku nevojitet vetëm një shumicë e thjeshtë. Shumica ka kërkuar që ndryshimet kushtetuese të votohen më 21 korrik.

Po sot administrata e parlamentit u ka shpërndarë deputetëve një botim të Kushtetutës së vendit ku janë përfshirë dhe ndryshimet e reja të parashikuara nga projektii Reformës në Drejtësi. Botimi është mundësuar nga Ambasada e Shteteve të Bashkuara në Tiranë dhe misioni amerikan I ndihmës ligjore nga Departamenti I Drejtësisë, OPDAT.

Trego komentet

XS
SM
MD
LG