Pentagoni njoftoi se do të lejojë individët transeksualë, burra dhe gra, që të shërbejnë hapur në ushtrinë amerikane, duke shfuqizuar një prej masave ndaluese për shërbimin në forcat e armatosura.
Sekretari i Mbrojtjes Ash Carter e njoftoi këtë vendim dje, në një konferencë shtypi në Pentagon. Ai tha se 100 për qind e popullsisë së Amerikës duhet të kenë mundësi të shërbejnë në ushtri.
"Janë tre arsyet e këtij vendimi: ato kanë të bëjnë me ushtrinë tonë në të ardhmen, atë aktuale dhe me çështje parimore. Arsyeja e parë dhe themelore është se Departamenti i Mbrojtjes dhe ushtria kanë nevojë për të gjithë talentin e mundshëm, me qëllim që të mbetet në nivelin që është - forca luftarake më e shkëlqyer që ka njohur ndonjëherë bota.”
Zoti Carter tha se misioni i ushtrisë është të mbrojë vendin dhe Pentagoni nuk dëshiron që pengesat, të cilat nuk lidhen me kualifikimin e personit ta pengojnë atë të kryejë shërbimin ushtarak.
Aaron Belkin, ekspert për personat LGBT në ushtri dhe drejtor i institutit studimor “Palm Center” me bazë në Kaliforni, e përshëndeti këtë vendim si historik.
"Ky vendim do të thotë se ne jemi një vend gjithpërfshirës dhe nuk i ndalojmë njerëzit për shkak të identitetit të tyre. Ne nuk i caktojmë njerëzit në vende pune për shkak të gjinisë së tyre, por u japim atyre mundësinë të shërbejnë në ushtri bazuar në aftësitë që kanë”.
Zoti Carter tha se aktualisht ka rreth 2 mijë e 500 individë transseksualë që janë ushtarakë aktivë.
“Jo më vonë se pas një viti, shtoi zoti Carter, ”ushtria do të fillojë të pranojë në radhët e saj amerikanë transseksualë, të cilët përmbushin të gjitha standartet mendore dhe fizike.”
Njoftim bëhet pas një studimi një vjeçar nga Korporata RAND, që arriti në përfundimin se lejimi i individëve transeksualë për të shërbyer hapur në ushtri do të kishte “ndikime minimale te gatishmëria ushtarake”.