Politikanët irakianë thonë se asambleja e re kombëtare do të mblidhet për herë të dytë të martën për të emëruar udhëheqësit në postet më të larta qeveritare.
Negociatat janë intensifikuar ditët e fundit, pas paralajmërimeve të krerëve fetarë se shtyrjet e vazhdueshme po krijojnë një klimë pasigurie dhe mund të keqësojnë gjendjen e sigurisë.
Zyrtarët në Bagdat thonë se forcat e sigurimit arrestuan të paktën 120 persona të dyshuar se po planifikonin një sulm në shkallë të gjerë kundër shumicës shiite të vendit.
Zyrtarë të ministrisë së mbrojtjes thanë se arrestimet u bënë sot gjatë një bastisjeje në orët e para të mëngjesit pranë qytetit të shenjtë të Qerbelasë. Ushtarët konfiskuan gjithashtu tonelata eksplozivë, qindra armë dhe rreth 250 mijë fishekë.
Zyrtarët irakianë thanë se personat e dyshuar si kryengritës po planifikonin të sulmonin pelegrinët myslimanë që do të vizitonin Qerbelanë javën e ardhëshme gjatë një kremtimi fetar.