Kryengritësit në qytetin Ramadi, në perëndim të Irakut, kryen sot një sulm kundër një baze amerikane dhe ndërtesave qeveritare.
Për incidentin njoftuan fillimisht banorët e qytetit. Ata thanë se dhjetra persona të maskuar dhe të armatosur të cilët mendohet se janë pjesëtarë të grupit terrorist të al-Qaidës në Irak kaluan në rrugët e qytetit, duke qëlluar me mortaja dhe raketa. Sulmi ndodhi ndërkohë që udhëheqësit fisnorë dhe zyrtarë të ushtrisë amerikane po zhvillonin një takim.
Zëdhënësi i ushtrisë amerikane e minimizoi incidentin, duke thënë se pati vetëm një sulm me raketa granada-hedhëse ndaj një pike kontrolli të pëbashkët irakiane dhe të forcave të koalicionit dhe se nuk pati viktima.
Trupat amerikane dhe ato irakiane ndodhen në Ramadi që nga dita e dielë, për të kryer një operacion kundër kryengritësve në prag të zgjedhjeve parlamentare të 15 dhjetorit. Por zyrtarët paralajmërojnë se presin një rritje të dhunës, ndërsa kryengritësit bëhen përherë e më të dëshpëruar në prag të votimeve.