Lidhje

IFES: Popullsia e Kosovës është e painformuar për sistemin e drejtësisë


Një organizatë ndërkombëtare që punon për konsolidimin e demokracisë në vendet në zhvillim thotë se shumë njerëz në Kosovë janë të painformuar për elementë thelbësorë të sistemit ligjor dhe të gjyqësorit. IFES e nxorri këtë përfundim nga një anketë që kreu për Agjencinë Amerikane për Zhvillimin Ndërkombëtar, rezultatet e së cilës u bënë publike të hënën.

Sipas sondazhit që u krye nga 8 deri më 26 gusht, më pak se një e katërta e 1,226 të anketuarve nga e gjithë Kosova dinë sesi të marrin informacion për ligjet në bazë të të cilave ata qeverisen dhe më pak se gjysma i njohin procedurat gjyqësore, si për shembull sesi të apelojnë një vendim gjykate.

Megjithatë, në raportin e organizatës IFES thuhet se shumica e banorëve të Kosovës i njohin të drejtat e tyre ligjore dhe shumë prej tyre dinë sesi të gjejnë një avokat mbrojtës.

“Ndërkohë që numri i qytetetarëve që shprehin besimin tek paanësia e gjyqësorit është rritur në krahasim me një sondazh të vitit 2004, mosbesimi i tyre i vazhdueshëm ndaj integritetit dhe aftësive të gjykatësve, si edhe niveli i ulët i informimit për ligjet, janë disa nga sfidat më urgjente që duhet të marrin udhë tani që por mbahen bisedimet për statusin e Kosovës”, citohet të ketë thëmë Violaine Autheman, eksperte e IFES-it, në njoftimin e shtypit të organizatës.

Sipas anketës, numri i serbëve që kanë informacion për procedurat bazë të gjyqësorit dhe gjykatave është më i pakët se ai i shqiptarëve. Gjithashtu media mbetet burimi kryesor i informacionit në Kosovë. 84 për qind e banorëve në Kosovë besojnë se media vendase është objektive dhe 88 për qind e popullsisë e merr infornacionin për sistemin gjyqësor përmes medias.

Ndërkohë shumica e serbëve mendojnë se sistemi gjyqësor në Kosovë është i njëanshëm dhe nuk kanë besim tek sistemi i drejtësisë dhe gjykatat.

Sipas raportit, 70 për qind e të anketuarve besojnë se korrupsioni ndodh gjithmonë ose ndonjëherë mes gjykatësve, 65 për qind mes avokatëve, 58 për qind mes prokurorëve dhe 51 për qind mes zyrtarëve të tjerë të gjykatës.

XS
SM
MD
LG