Presidenti rus Vladimir Putin thotë se parashikon që ta ruajë ndikimin politik pasi të japë dorëheqjen në fund të mandatit në vitin 2008. Zoti Putin i bëri komentet sot në një emision televiziv që u transmetua në gjithë vendin ku iu përgjigj pyetjeve për rreth tri orë.
Ai nuk dha hollësi për planin e tij pasi të përfundojë mandatin, por shprehu shpresën se do të vazhdojë të gëzojë besimin e popullit rus.
Udhëheqësi rus u zotua gjithashtu se vrasësit e bankierit Andrei Kozlov dhe gazetares së njohur, kritike e Kremlinit Ana Politkovskaya do të nxirren para drejtësisë. Ai vuri në dukje se tre të dyshuarit në vrasjen e Kozllovit janë nën arrest. Zoti Putin vlerësoi gjithashtu ekonominë ruse duke thënë se ajo po rritet me afro shtatë për qind në vit.//lk