Pekini thotë se udhëheqësi koreano verior Kim Jong Il u deklaroi zyrtarëve kinezë se nuk ka në plan të kryejë një provë tjetër bërthamore, në se nuk detyrohet nga trysnia ndërkombëtare të ndryshojë qëndrim.
Një zëdhënës i ministrisë së jashtme kineze po ashtu mohoi njoftimet e shtypit sipas të cilave zoti Kim i kishte kërkuar ndjesë një të dërguari kinez javën e kaluar për shqetësimin ndërkombëtar që shkaktoi prova bërthamore e vendit të tij.
Pheniani e kreu provën bërthamore më 9 tetor dhe udhëheqësit botërorë po punojnë për ta bindur Korenë e Veriut të rikthehet në bisedimet 6-palëshe të çarmatimit.
Vendet fqinje të Koresë së Veriut janë vënë në gjendje gadishmërie që pas provës bërthamore të Phenianit.
Po dje më herët, ministri i jashtëm japonez, Taro Aso, hodhi poshtë kërkesën e Koresë së Veriut që sanksionet amerikane kundër Phenianit duhet të hiqen në mënyrë që koreano-veriorët të rikthehen në bisedimet 6-palëshe mbi programin e armëve bërthamore. //ze//