Presidenti Bush pranoi gjatë një konference shtypi se fitorja e demokratëve në zgjedhjet për në Kongres është një sinjal se amerikanët janë të pakënaqur me mungesën e përparimit në Irak.
Gjatë një konference shtypi sot në Uashington, Presidenti Bush tha se ai është i zhgënjyer me rezultatet e zgjedhjeve të së martës. Ai përshëndeti demokratët që zhvilluan një fushatë të disiplinuar, gjatë së cilës opozita mori kontrollin e Dhomës së Përfaqësuesve dhe mund të marë edhe kontrollin e Senatit.
Presidenti tha se ai ka biseduar si me udhëheqës demokratë edhe republikanë dhe u ka bërë thirrje të dy partive të bashkëpunojnë për të zgjidhur problemet e vështira me të cilat ndeshet vendi, përfshirë ekonominë, sektorin e energjitikës dhe luftën në Irak.
Presidenti Bush tha se ai do të punojë me kryetaren e ardhshme të Dhomës së Përfaqësuesve Nensi Pelozi për të gjetur pika të përbashkëta për të çuar vendin përpara.
Ligjvënësja demokrate nga Kalifornia ka qënë kritike e ashpër e Presidentit Bush dhe luftës në Irak.
Presidenti tha se votuesit presin që dy partitë të bashkëpunojnë. Një prej çështjeve për të cilën mund të bashkëpunohet tha ai, është për rritjen e pagës minimale, si dhe për ligjin për shkollimin e fëmijve, një ligj i miratuar me nismën e Presidentit Bush.
Presidenti po ashtu tha se ai ka besim të plotë tek nënpresidenti Dik Çeni. Nënpresidenti, tha ai, do të qëndrojë në detyrë deri në fund të mandatit.