Presidenti amerikan Xhorxh Bush, thotë se administrata e tij po shqyrton raportin e grupit dypartiak, i publikuar javën e kaluar mbi situatën në Irak dhe do të marrë seriozisht në konsideratë rekomandimet e tij. Ai do të shqyrtojë gjithashtu edhe vlerësimet e tjera mbi strategjinë amerikane në Irak.
Presidenti Bush thotë se ai pajtohet me vlerrësimet e Grupit Studimor mbi Irakun, se vendi mund të vetëqeveriset, të përballojë nevojat e veta dhe të vetëmbrohet. Në fjalimin e tij të përjavëshëm në radio, ai tha dje gjithashtu se inkurajohet nga përfundimi i grupit për pasigurinë e një tërheqjeje të papritur të trupave amerikane nga Iraku.
“Grupi Studimor mbi Irakun kupton nevojën e suksesit në Irak. Grupi gjithashtu kupton se ndërkohë që rruga përpara nuk është e lehtë, suksesi në Irak është i rëndësishëm dhe jo i pamundur.”
Raporti i publikuar ditën e mërkurë bëri rekomandime specifike për atë që e cilësoi si “një gjendje të rëndë që po keqësohet në Irak.” Midis rekomandimeve përfshihet edhe tërheqja e shumicës së forcave amerikane luftuese nga fillimi i vitit të ardhëshëm. Gjithashtu rekoamndon ndryshimin e misionit të forcave amerikane, nga një mision luftues, në një mision për stërvitje dhe mbështetje.
Raporti sugjeron që Shtetet e Bashkuara të trajtojnë çështjen e stabilizimit të Irakut duke përfshirë në bisedime vendet rajonale, në krahasim me rrugën e njëanëshme të ndjekur deri tani.
Presidenti Bush u përgjigj se, as ai dhe as Kongresi nuk do të miratojnë të 79-të rekoamndimet e propozuara nga grupi. Megjithatë ai u zotua t’i konsiderojë ato seriozisht, së bashku me vlerësimet nga Pentagoni, Departamenti i Stetit dhe Këshilli Kombëtar i Sigurimit.
“Unë pres paraqitjen e të gjitha rekomandimeve. Kërkoj që në fillim të dëgjoj të gjitha këshillat dhe në fund të vendos mbi kursin e ri në Irak.”
Në fjalimin radiofonik të demokratëve, kryetari i ardhëshëm i Komisionit të Dhomës së Përfaqësuesve për Shërbimet Sekrete, Silvester Reis, tha se raporti i Grupit Studimor mbi Irakun përfaqëson edhe pozitën e partisë së tij për hartimin e një kursi të ri në atë vend.
"Raporti konfirmon atë që shumë nga ne e dimë, se politika e presidentit Bush për vazhdimin e kursit në Irak nuk është e efektshme. Ne kemi nevojë për një strategji të re.”
Zoti Reis u pajtua me rekomandimin e raportit që Shtetet e Bashkuara të angazhojnë në bisedime Sirinë dhe Iranin.
“Presidenti Bush nuk e ka bërë këtë, por ai duhet të angazhojë në dialog Sirinë dhe Iranin sepse nga kjo varet siguria e vendit dhe e ardhmja e 150 mijë trupave që ndodhen në Irak.”
Ditën e premte sekretarja amerikane e shtetit, Kondoliza Rajs, tha se ajo është e gatshme për një dialog të gjerë me homologun e saj iranian, nëse Irani ndalon procesin e pasurimit të uraniumit dhe u kthehet negociatave mbi programin e tij bërthamor.
Në fjalimin e tij në radio, presidenti Bush tha se është përgjegjësia e republikanëve dhe demokeratëve për të bashkëpunuar në gjetjen e rrugës më të mirë përpara.
“E ardhmja e një rajoni rë rëndësishëm të botës dhe siguria e popullit amerikan varen nga fitorja në Irak. Jam i sigurt se ne do të kalojmë mosmarrëveshjet politike dhe të bashkëpunojmë për të arritur fitoren.”
Këtë javë presidenti pritet të takohet me zyrtarë ushtarakë dhe ekspertë të pavarur mbi Irakun.