Michael O'Reilly, bashkërendues i grupit për Mbrojtjen Ligjore të ish-kryeministrit të Kosovës Ramush Haradinaj, njoftoi sot se seanca statutore për rastin e Ramush Haradinajt dhe të tjerëve, do të mbahet nesër pasdite në gjykatën e Hagës.
Kjo do të jetë seanca e fundit e këtij lloji para se të fillojë procesi gjyqësor. Zoti Haradinaj do të përfaqësohet në seancë nga avokatët e tij. Pritet që seanca të shqyrtojë çështje të tilla si data e fillimit të procesit të gjykimit dhe forma përfundimtare e aktakuzës. Grupi i mbrojtjes pret që procesi gjyqësor të fillojë nga mesi i muajit shkurt.
Megjithatë avokatët mbrojtës thonë se ka mundësi të ketë ndonjë vonesë të shkurtër. Zoti Haradinaj do të kthehet në Hagë, afërsisht një javë para fillimit të gjykimit.