Operacioni bajpas i arterieve koronare është një nga procedurat më të zakonshme për pacientët me zemër. Vetëm në Shtetet e Bashkuara, kryen çdo vit rreth 350 mijë operacione të tilla. Ky fakt i ka bërë disa ekspertë të shqetësohen në se operacioni është i përshtatshëm për pacientë të tjerë, përveç atyre që vuajnë nga sëmundje të rënda të arterieve koronare.
Tani po shtohen shqetësimet rreth një ilaçi që përdoret shpesh gjatë operacioneve për të kontrolluar hemoragjinë. Ilaçi quhet aprotinin. Kompania farmaceutike gjermane Bayer e shet atë në Shtetet e Bashkuara nën emrin Trasylol.
Në vitin 2006, Administrata Amerikane e Ushqimit dhe Ilaçeve filloi të analizojë rezultatet e dy studimeve. Ato tregojnë një lidhje të drejtëpërdrejtë midis aprotininës dhe rritjes së rrezikut për bllokimin e funksionimit të veshkave si dhe dobësimit të zemrës deri në pushim, kur u jepen pacientëve që i janë nënshtruar operacionit bajpas.
Si rezultat, administrata nxorri një paralajmërim në etiketën e ilaçit që ky i fundit të përdoret vetëm për pacientët me rrezik të lartë hemorragjie ose që kanë nevojë për transfuzion gjaku gjatë operacioneve emergjente bajpas.
Si drejtues i repartit të kardio-kirurgjisë në Spitalin Northwestern Memorial në Chicago, mjeku Patrick McCarthy ka kryer më shumë se 5 mijë operacione bajpas.
"Operacioni në zemër ka disa rreziqe dhe hemorragjia është një prej tyre, pra është një gjë e zakonshme për ne".
Tani studimet me gati 4 mijë pacientë në Amerikën e Jugut dhe të Veriut, Evropë dhe Azi tregojnë se një numër i ndjeshëm i mpiksjeve fatale të gjakut gjatë operacionit bajpass lidhen me përdorimin e aprotininës. Doktor Dennis Mangano shpjegon.
"Zbulimi kryesor i studimit është se aprotinina, një nga tre medikamentet që kemi testuar, është e pasigurtë. Dhe kjo është e lidhur me rritjen e vdekjeve gjatë pesë vjetëve pas operacionit".
Doktor Mangano dhe studiues të tjerë në Fondacionin për Kërkimet e Ishemisë në San Bruno të Kalifornisë studiuan aprotininën dhe dy ilaçe të tjera të ngjashme. Ai u shqetësua nga përfundimet.
"Ne do të kishim shpëtuar rreth10 mijë njerëz në se në vend të aprotininës, do të kishim përdorur një nga dy ilaçet e tjera".
Nga studimet që nxxitën autoritetet në vitin 2006 të paralajmëronin për aprotininën, firma Bayer pagoi për njërin, dhe e publikoi disa ditë para se agjencia federale të bënte publik paralajmërimin.
Firma Bayer e kundërshton studimin nga Fondacionin i Ishemisë. Kompania gjermane i quan të dhënat të pabaza. Ndërkohë, në janar të këtij viti kompania Bayer përfundoi tre prova klinike për përdorimin e aprotininës gjatë operacioneve për raste të ndryshme kanceri. //ze//