Nënpresidenti amerikan Dik Çeni dhe Kryeministri japonez Shinzo Abe ranë dakord sot në Tokio, që të dyja vendet te ndjekin nga afër aftësitë ushtarake të Kinës.
Një zyrtar i Ministrisë së Jashtme japoneze u tha gazetarëve se zotërinjtë Abe dhe Çeni shprehën shqetësim të përbashkët lidhur me fuqizimin ushtarak të Kinës si dhe me provën e saj me raketë kundër satelitëve. Muajin e kaluar, Kina rrëzoi me një raketë provë një prej satelitëve të saj meteorologjikë, duke u bërë vendi i tretë që kryen prova të kësaj natyre.
Shtetet e Bashkuara dhe ish-Bashkimi Sovjetik i kanë testuar armë të tilla rreth 20 vjet më parë. Në një tjetër zhvillim, Nënpresidenti Çeni bëri thirrje për zgjidhjen e mosmarrëveshjeve mes Japonisë dhe Koresë së Veriut, për shtetasit japonezë të rrëmbyer nga Peniani.
Zoti Çeni tha se Shtetet e Bashkuara e kuptojnë refuzimin e Japonisë për të ndihmuar ekonomikisht Korenë e Veriut, deri në sqarimin e asaj që ai e cilësoi, “çështje tragjike” të rrëmbimit të japonezëve.//lk