Bashkimi Evropian kritikoi anëtaret më të reja Bullgarinë dhe Rumaninë për përparim të pamjaftueshëm në luftën kundër korrupsionit dhe krimit të organizuar, por ndaj këtyre dy vendeve nuk u vendos ndonjë sanksion.
Komisioneri i Bashkimit Evropian për Drejtësinë, Franko Fratini, në raportin që u lëshua sot, u bën thirrje Bullgarisë e Rumanisë që të tregohen më këmbëngulëse në zbatimin e reformave juridike dhe kundër korrupsionit. Në raport bëhet thirrje për përqasje më të rrepta për të plotësuar standartet e Bashkimit Evropian për përparim në këto fusha.
Mos plotësimi i këtyre standarteve mund të çojë në vendosjen e sanksioneve pas paraqitjes së një raporti të ri qershorin e vitit të ardhshëm. Në raportin e Bashkimit Evropian theksohet se Bullgaria dhe Rumania kanë bërë një farë përparimi në reformimin e gjyqsorit, por në përgjithësi ky përparim cilësohet i pakënaqshëm. //ze//