Ambasadori amerikan në Irak, Ryan Crocker tha se nuk ka ilaç magjik për të arritur ripajtimin kombëtar në Irak.
Ambasadori amerikan së bashku me Gjeneralin David Petraeus, komandanti i lartë i ushtrisë amerikane në Irak folën sot për gazetarët në Washington. Zoti Crocker tha se ripajtimi dhe rivendosja e shërbimeve në Irak do të jenë një proces i gjatë, i vështirë dhe i dhimbshëm. Por ai shtoi se ka shenja që tregojnë se irakianët kanë jo vetëm mundësinë por edhe vullnetin për të arritur këto objektiva.
Ambasadori nuk ishte i gatshëm të bënte ndonjë parashikim për sa kohë trupat amerikane do të qëndrojnë në Irak.
Presidenti Bush pritet të njoftojë nesër planet për tërheqjen e 30 mijë truapave nga Iraku nga mesi i vitit 2008. Tërheqja e propozuar do të pakësojë praninë amerikane në gati 130 mijë trupa – niveli që ishte para shtimit të trupave këtë vit për të ulur dhunën sektare.
Udhëheqësit demokrat në kongres kanë kritikuar planin e presidentit. Kryetarja e Dhomës së Përfaqësuesve, Nancy Pelosi, tha dje se plani është ofendues për inteligjencën e popullit amerikan. //iç//