Zjarrfikësit nga zonat perëndimore të Shteteve të Bashkuara po përballen për të katërtën ditë me zjarre masive në Kaliforninë jugore. Meteorologët thonë se erërat e forta, me shpejtësi gati 100 kilometra në orë, duhet të qetësohen sot, duke u dhënë zjarrfikësve mundësi më të mirë për të shuar zjarret.
Zjarret kanë djegur më shumë se 1 mijë e 500 shtëpi dhe ndërtesa të tjera dhe kanë detyruar evakuimin e mbi 500 mijë njerzve nga shtëpitë e tyre. Zjarret po përhapen si pasojë e erërave me mot të thatë e të nxehtë, duke djegur më shumë se 165 mijë hektarë në zonat midis Los Anxhelosit dhe San Diegos.
Të paktën 5 vetë kanë vdekur nga zjarret, mes tyre 3 të moshuar ndërsa po evakuoheshin. Të paktën 40 persona të tjerë janë plagosur, përfshirë edhe 24 zjarrfikës. Guvernatori i Kalifornisë, Arnold Shvarcenegër, tha se të paktën 68 mijë shtëpi vazhdojnë të jenë në rrezik dhe mbi 6 mijë zjarrfikës vazhdojnë të luftojnë me flakët.
Zyrtarët vendorë thonë se burimet e tyre janë konsumuar së tepërmi nga zjarret. Shtëpia e Bardhë tha se Presidenti Bush do të vizitojë nesër Kaliforninë. Zëdhënësja Dana Perino tha se presidenti do të inspektojë nga afër vendet e shkatërruara nga zjarret, do të njihet me përpjekjet e emergjencës, do të takohet me njerëz të cilët janë prekur nga zjarret. Më parë, Presidenti Bush ka autorizuar dhënien e ndihmave nga qeveria federale për 7 zona të shkatërruara nga zjarret.