Lidhje

Kina: Numri i të vdekurve mund të arrijë në 50 mijë vetë


Kina thotë se rreth 400 diga dhe rezervuare pranë epiqendrës së tërmetit janë dëmtuar, duke ngritur shqetësime të reja, ndërsa zyrtarët kinezë paralajmëruan sot, se numri i vdekjeve mund të kapë shifrën e 50 mijë vetëve.

Forcat e ushtrisë po përpiqen me të gjitha forcat të shpëtojnë dhjetra mijëra njerëz që mendohet se mund të kenë mbetur nën rrënoja. Zyrtarët në provincën jugperëndimore të Sëçuanit thonë se numri i të vdekurve është rritur, në më tepër se 19 mijë e 500 vetë.

Agjencia kineze e lajmeve HSINHUA thotë se trupat janë dërguar për të riparuar të çarat që ka pësuar Diga Zipingpu. Ministri kinez i Ujit tha se problematike mbetet çështja e sigurisë së ujit të rezervuareve dhe hidrocentraleve në zonën e tërmetit.

Autoritetet pranojnë se po zbehen shpresat për gjetjen e njerëzve të tjerë që mund të kenë mbetur gjallë nën rrënoja, tre ditë pas tërmetit të fuqishëm. Disa banorë të mbetur pa shtëpi po fillojnë të ankohen për përgjigjen e qeverisë ndaj pasojave të tërmetit dhe mungesën e pajisjeve të emergjencës.//lk

XS
SM
MD
LG