Në
Amerikën e viteve 20-30 alkohooli ishte i ndaluar. Ndaj uiski i prodhuar
ilegalisht me anë të distilimit të alkooholit nga misri, ishte një prej
produkteve më të sukseshme të kontrabandës. Armiku më i madh i kontrabandistëve
ishte drita e hënës, pasi ata mund të diktoheshin nga policia. Që nga ajo
prodhimi i paligjshëm i pijeve alkoholike u quajt moonshine, ose drita e hënës.
Edhe në ditët e sotme, thuhet se në disa pjesë të vendit vazhdon prodhimi dhe
tregtia ilegale e pijeve të forta. Por një prodhues i uiskit nga misri në
shtetin Virxhinia ka ndërtuar një model krejt të ndryshëm biznesi sigurisht
të ligjshëm.
Ferma Belmont prodhon uiski prej më shumë se dy dekadash. Sekreti i suksesit është përdorimi i procesit të dikurshëm të distilimit sipas parimit të asaj kohe të quajtur moonshine kur uiski prodhohej ilegalisht. Chuck Miller është specialist për këtë punë.
"Ishim të parët që përdorëm këtë praktikë. Ndryshimi është që ne jemi të ligjshëm por kemi ruajtur traditën amerikane të prodhimit."
"Është pije e fortë. Nga pamja e tejdukshme në shishe duket i padëmshëm por ka shije. Ngjason më shumë me tekilën sesa me vodkën. Duhet pirë me kujdes sepse është i fortë."
Chuck e ka
trashëguar recetën nga gjyshi i cili ishte kontrabandist në vitet 20 dhe 30. Në ato
vite, alkooholi ishte i ndaluar në Amerikë. Historia e gjyshit e intrigoi
Chakun dhe ai vendosi të realizonte projektin në fjalë por tashmë brenda
ligjeve, pa u përballur me ata që dikur ndiqnin gjyshin e tij, Byronë federale
kundër alkooholit, duhanit dhe armëve të zjarrit.
"Kur isha fëmijë kaloja shumë kohë me
gjyshin, ishte tejet interesant. Ndaj duke menduar më lindi ideja për të
fituar. Por nuk desha të isha kontrabandist ndaj ndërtova biznesin në bazë të
rregullave dhe u liçensova."
Kjo
ndodhi 20 vjet më parë. Por kohët e fundit, familja Miller mori një liçensë
edhe për shitjen e prodhimeve të saj. Ndërkohë, shishet, të cilat kalojnë
përmes kësaj pajisje për staxhionimin e alkooholit, vazhdojnë të gjejnë blerës
në zonat ku dikur prodhimi bëhej kontrabandë.
"Atëhetë prodhimi i uiskit bëhej në male,
sepse ishte vend i mirë për tu fshehur. Ndaj njerëzit që jetonin atje ishin të
mësuar me pijen. Po të vëresh sot, dyqanet që shesin uiskin tim ndodhen pranë
zonave të larta."
Duke qënë një punishte e liçensuar, familja Miller ka mundur ta zgjerojë biznesin duke arritur që vitin e kaluar të shesë 60 mijë shishe uiski.//rd//