Ndihmës sekretari amerikan i Shtetit për Çështjet
Evropiane, Daniel Fried, tha dje se Shtetet e Bashkuara janë të kënaqura me
përparimin e bërë në Kosovë që nga shpallja e pavarësisë në muajin shkurt. Megjithatë, zoti Fried tha se Kosova
përballet ende me sfida, përfshirë edhe grupet e gangsterëve politikë
serbë.
Eksperti kryesor i Departamentit të Shtetit për çështjet Evropiane, Daniel Fried tha se gjendja relativisht e qetë dhe suksesi politik në Kosovë që nga muaji shkurt, i ka bërë të heshtin kritikët, të cilët kishin parashikuar situata të vështira për rajonin, përfshirë dhunën etnike dhe flukset e refugjatëve.
Por zoti Fried, vuri në dukje se shteti i ri e delikat ka përballë një sërë sfidash, përfshirë ekonominë, pakicën e irrituar serbe në veri dhe gangstresizmin politik, që sipas tij mund të jetë i nxitur nga disa zyrtarë në Beograd.
Kosova, e administruar nga Kombet e Bashkuara që nga viti 1999, shpalli pavarësinë në muajin shkurt megjithë kundërshtimin e fuqishëm të Serbisë dhe aleates së saj kryesore diplomatike, Rusisë.
Në një konferencë me gazetarët, zoti Fried tha se Kosova e pavarur është njohur tashmë nga 43 shtete, ndër të cilat krahas Shteteve të Bashkuara janë shumica e vendeve evropiane dhe shumica e anëtarëve të Këshillit të Sigurimit të Kombeve të Bashkuara.
Në përgjigje të pyetjeve që i drejtuan gazetarët, Daniel Fried, hodhi poshtë idenë se refuzimi i Rusisë për ta njohur Kosovën dhe rrjedhimisht bllokimi i njohjes së saj unanimisht nga Këshilli i Sigurimit i OKB-së, e lë atë në pozitat e një gjysmë shteti.
"Ajo është një shtet plotësisht i pavarur, me ose pa një rezolutë të Kombeve të Bashkuara, që ta sanksionojë atë. Ajo është e pavarur. Ajo është njohur nga dy të tretat e Evropës, Japonia dhe Australia. Ajo është një vend i pavarur. Është për të ardhur keq që Rusia zgjodhi rrugën e vështirësimit të procesit, në vend që ta bënte atë më të lehtë, duke krijuar kështu kushte për të rezikuar stabilitetin, si dhe duke e bërë më të vështirë të ardhmen evropiane të Serbisë. Kjo nuk ishte e dobishme".
Zoti Fried tha se shpreson që me kalimin e kohës, Moska do ta ndyshojë qendrimin e saj intransigjent lidhur me Kosvën dhe nuk do të përpiqet ta pengojë qeverinë e re të moderuar të Beogradit të ndjekë rrugën drejt të ardhmes evropiane, siç u shpreh ai.
Ndihmës sekretari amerikan i Shtetit tha se parlamenti paralel, i formuar në fund të muajit të kaluar nga serbët në veri të Kosovës, nuk ka status ligjor. Zoti Fried tha gjithashtu se shumë serbë të Kosovës janë të gatshëm të pranojnë realitetin e ri politik, por kanë frikë ta thonë këtë publikisht, pasi kërcënohen nga gangsterët ekstremistë serbë, disa prej të cilëve kanë hyrë në Kosovë nga Serbia.
"Për serbët që kanë hyrë në Kosovë, është vështirë të thuhet nëse ata janë qytetarë të thjeshtë nacionalistë, apo të lidhur disi me qeverisë, apo zyrtarë. Duket se disa prej tyre ose të gjithë janë të tillë dhe serbët nuk duhet të dërgohen me qëllime të caktuara në Kosovë ose për të mbështetur gangsterizmin. Ky nuk është një veprim i përgjegjshëm. Ne shpresojmë që qeveria e re të veprojë në mënyrë të përgjegjëshme".
Zoti Fried, tha se Shtetet e Bashkuara do të japin një fond prej 400 milionë dollarësh gjatë një periudhe 4-vjeçare në konferencën e vendeve donatore për Kosovën, që mbahet në fund të javës së ardhëshme, konferencë e organizuar nga Bashkimi Evropian.
Ndihmës sekretari amerikan i Shtetit për Çështjet Evropiane, Daniel Fried, tha se pret që në këtë konferencë të mblidhen më shumë se një miliardë dollarë për të nxitur ekonominë e shtetit të ri, që është një nga vendet më të varfëra të Evropës, me një shkallë papunësie prej rreth 40 përqind.