Në Shtetet e Bashkuara, senatori republikan John McCain dhe
senatori demokrat Barack Obama, të cilët pritet të marrin emërimet e partive të
tyre si kandidatë për president, e kanë bërë temën e energjisë e sidomos uljen
e çmimit të energjisë, çështjen kryesore të fushatave të tyre. Secili prej tyre
ka dalë me një plan që thotë se funksionon duke kritikuar planin e tjetrit.
Megjithëse javën e fundit, çmimi i karburantit ka një farë rënieje, votuesit
përsëri kërkojnë që Uashingtoni të bëjë diçka. Kandidatët për president të dy
partive kryesore, e kanë kthyer këtë në një çështje po aq të nxehtë sa edhe
stina që po kalojmë.
Në qershor, kandidati republikan John McCain e ndryshoi qendrimin e tij lidhur
me ligjin federal që ndalon shpimetg për naftë në det.
"Duhet të shpojmë në det dhe të fillojmë menjëherë," deklaroi ai.
Zoti McCain e përshkruan rivalin e tij demokrat Barack Obama, si një
kandidat që nuk është gati ta përqafojë këtë ide.
"Nuk çuditem që ai po luan me këtë ide por fakt është se ai ende është
kundër shpimeve në det. Ne duhet të fillojmë qysh tani."
Por zoti Obama thotë se tani ai
është në favor të shpimeve në det përsa kohë që kjo të jetë pjesë e një plani
që i është paraqitur senatit dhe që përmban masa për energjinë alternativë.
"Jam gati ta studioj këtë ide nëse ajo është e domosdoshme për të siguruar
miratimin e paketës së përgjithshme për energjinë."
Ndryshimi i qendrimit të zotit
Obama për shpimet në det pasqyron popullaritetin që po gjen kjo ide mes
votuesve, sipas analistit politik Larry Sabato në Universitetin e Virxhinias.
"Mënyra më e mirë
për të parë nëse ideja e një kandidati ka fituar popullaritet është të shihet
nëse rivali i tij e përqafon këtë ide, qoftë edhe pjesërisht. Dhe pikërisht
këtë bëri edhe zoti Obama."
Të martën, zoti McCain vizitoi një
central bërthamor në jug të Detroitit,
ku bëri thirrje për ndërtimin e 45 centraleve të tillë deri në vitin
2030. Kandidatik republikan tha se zoti Obama është kundër kësaj mënyre për të
nxjerrë energji.
"Senatori Obama ka thënë se zgjerimi i centraleve bërthamore nuk ka kuptim
për Amerikën," u shpreh ai.
Senatori Obama, i cili thotë se e përkrah energjinë bërthamore nëse ajo
përfshin masa të forta sigurie, shton se zoti McCain edhe një herë po e
çorienton publikun.
"Ata e dinë se po gënjejnë lidhur me atë që përfaqëson plani im për
energjinë. Duket se ata krenohen për faktin që nuk e kanë idenë rreth këtij plani."
Tani që mbeten vetëm pak javë nga kuvendet e dy partive për emërimin zyrtar të
kandidatëve, po shtohen spekulimet se cilët do të jenë kandidatët për
nënpresident. //mm//