Presidenti i Ukrainës Viktor Jushçenko tha se vendi i tij duhet të forcojë mbrojtjen në përpjekjet për t’u anëtarësuar në aleancën e NATO-s.
Zoti Jushçenko i bëri këto komente të dielën në Kiev gjatë një fjalimi në ceremoninë e 17 vjetorit të pavarësisë së Ukrainës nga Bashkimi Sovjetik.
Këto komente bëhen ndërkohë që Rusia kundërshton ashpër aspiratat e Ukrainës dhe Gjeorgjisë për anëtarësim në NATO dhe vazhdon të mbajë të pushtuara pjesë të Gjeorgjisë.
Zoti Jushçenko dënoi atë që ai e quajti agresioni rus mbi Gjeorgjinë ndërkohë që u zotua se Ukraina nuk do të bëhet objektiv i ardhshëm i Rusisë.
Fjalimi i zotit Jushçenko erdhi pas një parade ushtarake të ushtrisë ukrainase ku marshuan tanke, kamionë ushtarakë dhe raketahedhës, ndërkohë që aeroplanët luftarakë fluturonin mbi vendin e paradës.
Në
Moskë, me rastin e këtij përvjetori, presidenti Rus, Dimitri Medvedev dhe
kryeministri Vladimir Putin bënë thirrje për marëdhënie më të ngushta ndërmjet
dy vendeve. //bsa//