Presidenti
George Bush tha se qeveria po përgjigjet me masa të pazakonta ndaj një “momenti
qenësor”, siç u shpreh ai, për ekonominë amerikane. Presidenti i bëri këto
komente në Shtëpinë e Bardhë, bashkë me një numër zyrtarësh të lartë të
sektorit financiar të vendit. Korrespondenti ynë në Shtëpinë e Bardhë, Scott
Stearns, njofton se presidenti kërkon që Kongresi të miratojë blerjen e
sigurimeve mbi bazat e kredive të rrezikshme për blerjen e shtëpive, për të
mbrojtur vendin nga një rrezik serioz.
Presidenti Bush tha se sistemi i sipërmarrjes së
lirë të Amerikës bazohet në besimin se qeveria duhet të ndërhyjë në
marrëdhëniet e tregut vetëm kur të jetë e domosdoshme. Duke pasur parasysh atë
që ai e quajti, gjendje të rrezikshme të tregjeve të sotme, zoti Bush tha se
ndërhyrja nuk është vetëm e justifikueshme, por edhe jetike.
“Ekonomia e Amerikës po përballet me sfida të pashembullta dhe ne po përgjigjemi me hapa të pashembullt”.
Sekretari i Thesarit, Henri Pollson, parashtroi sot një program për blerjen e sigurimeve, që mbështesin kredi të rrezikshme në blerjen e shtëpive, që ai tha se do të kushtojë qindra miliarda dollarë.
Ky hap kërkon miratimin e Kongresit,
prandaj Sekretari Pollson informoi mbrëmë udhëheqësit e Kongresit lidhur me
këtë program. Një ligjvënës me peshë në komisionin e Senatit për sistemin
bankar, republikani nga shteti i Alabamës, Richard Shelby, tha se marrja nën
kontroll e tregjeve financiare mund t’u kushtojë taksapaguesve deri në një
trilion dollarë.
Në një konferencë për shtyp në Shtëpinë e Bardhë, Presidenti Bush tha se nevojiten masa vendimtare për të mbrojtur sistemin financiar të Amerikës si dhe ekonomionë në përgjithësi:
“Këto masa do të kërkojnë që të vëmë në rrezik një sasi të konsiderueshme të parave të taksapaguesve. Këto hapa shoqërohen me rreziqe, por ne shpresojnë që eventualisht këto para të harxhuara të japin rezultate pozitive për vetë taksapaguesit”.
Presidenti
tha se pasiviteti shoqërohej me rrezik shumë më të madh, me humbje të
vendeve të punës, dëmtimin e llogarive të pensioneve, uljen e vlerës së
shtëpive dhe shterrimin e kredive të mundshme në të ardhmen. //rd//