Një zyrtar amerikan thotë se Presidenti Bush do të organizojë një takim
me udhëheqës botërorë për zgjidhjen e krizës financiare globale.
Zyrtari tha se takimi do zhvillohet në të ardhmen a afërt, me
pjesëmarrjen e vendeve të industrializuara dhe atyre në
zhvillim.Riorganizimi i sistemit financiar botëror ishte sot në rendin
e ditës të takimit që Presidenti Bush pati me udhëheqës kryesorë
evropianë. Por zyrtarët amerikanë paralajmëruan se nuk pritej ndonjë
zgjidhje e re. Presidenti Bush priti në Kemp Dejvid pranë Uashingtonit
Presidentin e Francës Nikola Sarkozi dhe Presidentin e Komisionit
Europian, Zhoze Manuel Barroso për bisedime mbi krizën ekonomike
botërore. Diskutimet pritej të përqendroheshin gjithashtu mbi një
propozim për mbajtjen e një takimi ekonomik të nivelit të lartë me
udhëheqësit e Grupit të Tetëshes dhe të vendeve të tjera. Sot, në
fjalimin e përjavshëm në radio, Presidenti Bush u përpoq përsëri të
sigurojë amerikanët se me kohë, masat agresive të administratës për të
zgjidhur krizën financiare do të ndihmojnë që ekonomia të rimëkëmbet.
Në përgjigjen e demokratëve në radio, kongresmeni Ram Emanuel fajësoi
politikat ekonomike të administrates Bush për krizën ekonomike në
Shtetet e Bashkuara. Ligjvënësi bëri thirrje për zbatimin e një plani
të demokratëve, i cili të synon të ndihmojë klasën e mesme amerikane. //ii