Në Shqipëri autoritetet më të larta të vendit përshëndetën sot firmosjen nga presidenti Bush të protokollit të anëtarësimit në NATO. Presidenti Bamir Topi i ka dërguar një mesazh falenderimi presidentit Bush duke vlerësuar se akti i mbrëmshëm rikonfirmoi besimin se Amerika mbetet aleati më i madh dhe më i besueshëm i Shqipërisë. Ndërsa kryeministri Sali Berisha theksoi se Shqipëria tashmë ka përgjegjësi më të mëdha për të konsoliduar shtetin ligjor dhe demokracinë
Shqipëria e përshëndeti firmosjen mbrëmë, nga Presidenti Bush të protokollit të anëtarësimit në Nato, sidomos për faktin se Shtetet e Bashkuara kanë qenë vendi kryesor që kanë nxitur dhe ndikuar të gjithë procesin e integrimit atlantik.
Presidenti Bamir Topi i dërgoi një mesazh falenderimi presidentit Bush ku nënvizon faktin se firmosja e protokollit “rikonfirmoi besimin se Shtetet e Bashkuara mbeten aleati më i madh dhe i besueshëm i Shqipërisë”. Presidenti Topi ka theksuar më tej se “ky vendim inkurajon proceset demokratike në Shqipëri e në të njëjtën kohë forcon vullnetin e popullit shqiptar për të ndërtuar një shtet të së drejtës, të lirisë dhe të respektit ndërinstitucional, nje shtet të aftë për përballuar me sukses sfidat që e ardhmja i rezervon”.
Nga ana e ti kryeministri Sali Berisha u shfaq para mediave pak pas mesditës duke u shprehur se firma e mbrëmshme e presidentit Bush “përbën aktin ligjor më madhor në historinë e marrëdhënieve mes dy vendeve pas njohjes nga “Shtetet e Bashkuara të Shqipërisë së pavarur dhe se përbën një besim të madh për shqiptarët, Shqipërinë, reformat e saj të suksesshme, dhe përpjekjet e saj pas ndarjes nga komunizmi”.
“Ky akt, kjo firmë e Presidentit të Shteteve të Bashkuara- tha kryeministri Berisha - është edhe një përgjegjësi madhore për Shqipërinë, shqiptarët, qeverinë shqiptare dhe institucionet e këtij vendi për të konsoliduar nëpërmjet reformave të thella dhe të gjithanshme shtetin ligjor , demokracinë e bazuar në vlerat e tregut. Me këtë rast unë duhet të garantoj qytetarët shqiptarë, duhet të garantoj Presidentin e Shteteve të Bashkuara dhe qeverinë e tij se qeveria ime do të ndërmarë të gjitha masat, do të ndjekë të gjitha reformat në mënyrë që demokracia, shteti ligjor, shoqëria e bazuar në vlerat e lirisë të njohin konsolidime të pandërprera”.
Shqipëria mori ftesën për anëtarësim në Nato së bashku me Kroacinë në prill të këtij viti dhe pranverën e ardhshme ajo pritet të bëhet anëtare me të drejta të plota. Deri tani, 8 vende nga 26 anëtaret e Natos kanë ratifikuar protokollin e anëtarësimit të Shqipërisë në Aleancë. //am