Megjithëse vemendja e shumicës së amerikanëve
është përqendruar këto ditë në Uashington, ku do të bëhet kalimi nga njëra
administratë në tjetrën, largimi i pritshëm i Presidentit Bush nga Shtëpia e
Bardhë po ndikon drejtpërdrejt mbi një qytet që ndodhet shumë larg nga
kryeqyteti i vendit. Për 8 vjet me radhë, Kroford-i i Teksasit ka qenë në
qendër të vemendjes sepse atje Presidenti Bush ka një fermë.
Këto ditë, makinat e pakta që shikon në rrugën kryesore të Krofordit janë më tepër të banorëve lokalë.
Imazhi i Presidentit Bush është ende i pranishëm në këtë kafene por ata që hanë
drekën këtu nuk e kanë më të vështirë të gjejnë tavolina bosh sepse turistët
nuk po vijnë më.
Disa persona këtu e shohin Presidentin Bush si njeriun i cili i dha emër qytetit të vogël Kroford. Zoti Bush vazhdon të jetë mjaft popullor në këto anë.
Por gjatë vitit të fundit, popullariteti i tij në vend ka rënë dhe bashkë me të
edhe numri i vizitorëve të këtushëm.
Lindon Lynch, i cili punon në një gurore thotë se nuk bëhet merak që Krofordi nuk është më “Shtëpia e Bardhë e Perëndimit”,
siç njihej deri tani.
"Nuk e di nëse do të ndryshojë shumë. Por këto dy vitet e fundit më duket
se ka patur një farë ngadalësimi." - thotë ai
Edhe protestuesit kundër luftës nuk i gjen më këtu. Disa vjet më parë, ata
kishin ngritur Shtëpinë e Paqes, pak kilometra larg fermës së Presidentit Bush.
Lindon Lynch ashtu si shumë banorë të tjerë e pëlqente ardhjen e turistëve por nuk
i interesonin dhe aq shumë ata që vinin për të protestuar.
"Për sa kohë që nuk kishte protestues, ardhja e turistëve ishte gjë e mirë
për biznesin. Por kur vinin protestuesit, kjo krijonte probleme."
Një nga dyqanet që vazhdon të qendrojë hapur është ai me emrin Red Bull, një
dyqan suveniresh me pronare zonjën Raidean Damon.
"Kur Presidenti Bush vinte këtu, për ne ai ishte jo thjesht president por
edhe komshi." - thotë ajo
Dyqani mbahet gjallë me klientë që vijnë këtu herë pas here.
Zonja Damon thotë se vendimi i zotit Bush për të blerë shtëpi në Dallas e ul mjaft rolin e qytetit Kroford.
Por ajo shpreson se çifti Bush do të vijë edhe këtu herë pas here pasi të
largohet nga Shtëpia e Bardhë kështu që biznesi nuk do të mbyllet fare.
Por Krofordi do të vazhdojë të ekzistojë. Stili rural i jetesës i cili
tërhoqi këtu familjen Bush vazhdon të tërheqë edhe familje të tjera nga qytete
më të mëdha, të cilat sipas saj, janë të interesuara në vlerat e forta familjare që ofron Krofordi.//mm//