Lidhje

Mishel Obama dhe stili i saj i veshjeve


Me dashurinë e saj për ngjyrat e ndezura dhe me pëlqimin për veshje që vënë në dukje trupin, Mishel Obama është zonja e parë që stilistët dhe shumë të tjerë që ndjekin modën kanë pritur prej kohësh. E njohur si grua që vesh të gjitha llojet e rrobave, që nga stilistët e famshëm Narcizo Rodriguez e deri tek ato që shiten në dyqanet e zakonshme amerikane si J. Crew dhe Target, zonja Obama është idhulli i fundit i stilit amerikan për çdo grua.

Andrea Renders e cila kryeson Institutin e Arteve në Çikago thotë se Mishel Obama do të sjellë një epokë të re në stilin amerikan.

“Stili i saj sjell diçka të re. Ajo është e re dhe moderne. Ajo është shumë praktike në mënyrën si vishet dhe do të sjellë një vizion të ri amerikan në këtë aspekt” - thotë ajo

Shumë thonë se ajo është si Xheki Kenedi kur erdhi në Shtëpinë e Bardhë në vitin 1961. Por ndryshe nga zonja Kenedi, Mishel Obama thuhet se është më popullore në stilin e saj të modës, duke blerë më shpesh nga stilistët më pak të kushtueshëm ku mund të blejnë të gjithë.

“Ajo është një grua moderne që ka stil dhe moderim në të njëjtën kohë. Mendoj se ka shije shumë të mirë. Ajo di t’i vlerësojë veshjet e cilësisë së lartë, por nuk duket se shpenzon shumë në përgjithësi për to.” - thotë ajo

Dhe me sa duket, gratë amerikane po i kushtojnë vëmendje veshjes së saj.Kur zonja Obama doli në kanalin televiziv ABC e veshur me një fustan 148 dollarësh nga një dyqan i zakonshëm, brenda 24 orësh fustanet e tjera si ai ishin shitur të gjithë.

Kërkesa për informacione rreth zonjës Obama është aq e lartë sa është krijuar një faqe interneti Mrs.O.org që i kushtohet zgjedhjeve të modës së Mishel Obamës.

Parashikuesit e modës thonë se stili i zonjës së parë do të jetë stil që do të imitohet mjaft në vitin 2009. //mm//

XS
SM
MD
LG