Sekretarja amerikane e Shtetit, Hillari Klinton, u takua dje me homologun e saj britanik dhe atë gjerman me të cilët diskutoi çështje si Afganistani, programi bërthamor i Iranit dhe konflikti izraelito-palestinez.
Zonja Klinton u takua në Departamentin e Shtetit me Sekretarin e Jashtëm britanik, Dejvid Miliband si dhe me homologun gjerman Frank-Valter Shtainmajer.
Ajo i quajti dy vendet aleatë të ngushtë dhe i falenderoi ato për kontributin në Afganistan.
Zonja Klinton tha se Shtetet e Bashkuara, Britania e Madhe dhe Gjermania do të punojnë bashkarisht në javët dhe muajt e ardhshshëm.
Zonja Klinton tha se ajo foli me dy ministrat e jashtëm mbi situatën në Pakistan, Lindjen e Mesme si dhe në Iran.
Zoti Milliband tha se qeveria britanike është e angazhuar për të bashkëpunuar me qeverinë amerikane mbi një sërë çështjesh. //ek//