Senati amerikan miratoi Hilda Solis në postin e Sekretares së Punës gjatë një votimi që ishte shtyrë nga debatet rreth mospagimit të taksave nga bashkëshorti i saj.
Zonja Solis është mes disa kandidatëve të caktuar nga presidenti Obama për poste qeveritare që u prekën nga çështja e taksave. Por dje, senatorët e miratuan emërimin e zonjës Solis me 80 vota pro dhe 17 kundër.
Hilda Solis, demokrate nga Kalifornia është e njohur si mbrojtëse e të drejtave të punëtorëve. Më parë ajo ka shërbyer si anëtare e Dhomës së Përfaqësuesve.
Në fillim të këtij muaji, një gazetë amerikane botoi një raport ku thuhej se i shoqi i zonjës Solis, pronar i një qëndre për riparimin e automjeteve, nuk kishte paguar rregullisht taksat. Kur ky lajm doli, ai i pagoi menjëherë taksat e prapambetura. //ek