Lidhje

Të hënën pritet të hiqen kufizimet për kërkime me qelizat embrionale


Presidenti amerikan Barak Obama pritet të nënshkruajë të hënën një urdhër ekzekutiv, që do të hiqte kufizimet ndaj fondeve federale për kërkime shkencore në fushën e qelizave embrionale.

Një zyrtar i administratës, duke folur në kushte anonimiteti, tha se Presidenti Obama do ta bëjë të njohur këtë vendim në një takim të hënën në Shtëpinë e Bardhë.

Përkrahësit thonë se kërkimet për qeliza embrionale mund të përdoren për përparimin e mjekësisë, në trajtimin e sëmundjeve, si Alxajmeri, Parkinsoni, apo për kurimin e dëmtimeve në shtyllën kurrizore.

Kritikët thonë se përdorimi i qelizave embrionale të njeriut për kërkime është një akt i pamoralshëm, që nuk mund të justifikohet, edhe pse rezultati që ai arrin është pozitiv. Ky veprim ka krijuar debate, sepse embrionet njerëzore shkatërrohen, me qëllim që të merren qelizat e tyre për eksperimentim.

Qelizat embrionale mund të zhvillohen në çfarëdo lloj qelize të trupit të njeriut.

Në gusht të vitit 2001, presidenti i atëhershëm Xhorxh Bush e ndaloi fondin qeveritar për kërkime në fushën e qelizave embrionale. Ai po ashtu i vuri veton një përpjekjeje në Kongres për ta ndryshuar vendimin e Presidentit.//lk

XS
SM
MD
LG