Ministri i Punëve të Brendshme, Zenun Pajaziti, thotë se policët serbë të Kosovës e kanë pezulluar vetveten nga Policia e Kosovës, ndërsa tërheq vërejtjen se policia e Kosovës do të veprojë si një e vetme në tërë territorin e vendit. Rreth 300 pjesëtarë serbë të policisë vazhdojnë në jenë të pezulluar nga puna, tash e një vit, ndërsa autoritetet janë vënë në përpjekje të gjetjes së një zgjidhje për t’i kthyer ata në vendet e tyre të punës.
Rreth 300 pjesëtarë serbë të policisë së Kosovë vazhdojnë të mbesin të pezulluar nga puna tash e një vit, ndonëse marrin paga të rregullta nga Policia e Kosovës. Disa ditë pas shpalljes së pavarësisë, policët serbe refuzuan të pranonin urdhrat e oficerëve shqiptarë, me kërkesën për t'i raportuar vetëm policisë së Kombeve të Bashkuara.
Ministri i Punëve të Brendshme, Zeniun Pajaziti, thotë se policët serbë e kanë pezulluar vetveten nga Policia e Kosovës, ndërsa tërheq vërejtjen se policia e Kosovës do të veprojë si një e vetme në tërë territorin e vendit.
“Fatkeqësisht mund të them se ende kjo pjesë e policisë mbetet shumë e politizuar, shumë e manipuluar nga politika zyrtare Beogradit dhe ne mbetemi ende në pozicionin kur ata nuk po punojmë”, thotë ministri Pajaziti.
“Roli i çdo kujt që do t’i ndihmojë ata të kthehen do të jetë pozitiv. Aq më tepër kur bëhet fjalë për shefin e Misionit të EULEX-it. Roli i tij do të jetë shumë i mirëseardhur dhe i nevojshëm në kontributin për t’i kthyer ata në vendet e tyre të punës. Çdo kush që do të kontribuojë do të jetë mirë, madje edhe vet politika e Beogradit zyrtar nëse do t’i ndihmojë ata ose të paktën të mos ndikojë negativisht, do të jetë pozitive që ata të kthehen dhe të punojnë normalisht në policinë e Kosovës, e cila e ka një zinxhir të vetëm komandues”.
Ministri i Punëve të Brendshme ka organizuar një grup punues, të përbërë edhe nga strukturat e policisë së Kosovës dhe EULEX-it, i cili do të bëjë vlerësimin e situatës në terren si dhe do të jap propozimet e nevojshme se si duhet vepruar në rastin e policëve serbë.
Ministri Pajaziti e sheh të nevojshme kthimin e policëve serbë në Policinë e Kosovës, posaçërisht për zonat e banuara me shumicë serbe, megjithatë, ai tërheq vërejtjen se institucionet e Kosovës nuk do të pranojnë asnjë zgjidhje tjetër e cila bie ndesh me kushtetutën e Republikës së Kosovës.
“Sa i përket policisë serbe, nuk do të ketë asnjëherë alternativë. Është një proces që po zhvillohet në kuadër të institucionet e tona, është edhe në përputhje me legjislacionin e që është procesi i decentralizimit, i cili do t’u jap komunave shumë më shumë kompetenca. Në kuadër të këtyre do të ketë, dhe është e përcaktuar edhe me ligjin për policinë, një përfshirje e madhe e komunave në përzgjedhjen e komandantëve për stacionet policore. Ky është procesi ynë legal, kjo është agjenda jonë të cilën institucionet e Kosovës po e përcjellin.”
Aktualisht në Policinë e Kosovës janë të angazhuar rreth 7 mijë e 200 pjesëtarë, 10 për qind e të cilëve janë nga radhët e komunitetit serb. //mm//