Mediat amerikane njoftojnë se hetimeve lidhur me vdekjen e papritur të yllit amerikan të muzikës pop, Majkëll Xhekson në 25 qershor, i është bashkuar edhe Administrata Federale e Ilaçeve.
Sipas njoftimeve, Departamenti i Policisë së Los Anxhelosit i ka kërkuar agjencisë të ndihmojë në gjetjen e shkakut të vdekjes së këngëtarit 50 vjeçar. Hetuesit morën dy qese të mëdha me ilaçe në shtëpinë ku banonte dhe ku u gjet i vdekur Majkëll Xheksoni. Flitet se Xheksoni mund të ketë vdekur nga pasojat e ilaçeve me recetën e mjekut.
Shkaku i vërtetë i vdekjes pritet të
mësohet pasi të dalë rezultati i analizave të lëndëve toksike, që mund
të marrë disa javë. Në një tjetër zhvillim, po lidhur me Majkëll
Xheksonin, një zëdhënës i familjes tha se po bëhen plane për funeralin,
por shtoi se homazhet nuk do të mbahen tek vila e tij, Neverland.