Sekretarja amerikane e Shtetit Hillari Klinton i bëri thirrje Afrikës së Jugut që të luajë një rol më të madh për zgjidhjen e krizës politike në Zimbabve.
Sekretarja Klinton bëri thirrje për marrëdhënie më të ngushta me Afrikën e Jugut pas një takimi me homologen e saj Maite Nkoana-Mashabane në kryeqytetin Pretoria të Afrikës së Jugut.
Zonja Klinton tha se Afrika e Jugut mund të luajë një rol të rëndësishëm në nxitjen e presidentit zimbabvian, Robert Mugabe që të zbatojë një marrëveshje për ndarjen e pushtetit me kryeministrin Morgan Çangirai.
Kryediplomatja amerikane tha se 3 milionë refugjatët zimbabvianë në Afrikën e Jugut simbolizojnë “dështimin e qeverisë për t’u kujdesur për popullin e vet”.
Sekretarja e shtetit u takua sot edhe me një grup afaristësh në Johanesburg. Ajo tha se si ekonomia më e madhe e kontinentit, Afrika e Jugut mund të luajë rolin kryesor në zhvillimin ekonomik të të gjithë Afrikës. //ii