Lidhje

NATO-ja propozon partneritet të ri me Rusinë për mbrojtjen


NATO-ja propozoi një partneritet të ri me Rusinë, duke thënë se të dyja duhet të punojnë së bashku në aspektin e mbrojtjes.

Sekretari i Përgjithshëm i NATO-s, Anders Fogh Rasmussen bëri thirrje sot në Bruksel për një “rishikim të përbashkët” të sfidave të sigurisë në shekullin e 21 dhe tha se Rusia duhet të jetë një “pjesmarrëse reale” dhe një “partnere” në sigurimin europian dhe ndërkombëtar.

Zoti Rasmussen tha se Rusia, NATO-ja dhe Shtetet e Bashkuara duhet të shikojnë mundësinë e lidhjes së sistemeve të raketave “në një kohë të përshtatëshme”.

I dërguari i Rusisë në NATO, Dmitry Rogozin tha se komentet e zotit Rasmussen janë “shumë pozitive dhe shumë konstruktive”. Ai tha se ata duhet t’i analizojnë së bashku propozimet e ndryshme.

Marrëdhëniet mes Rusisë dhe Europës Perëndimore u ngrohën pas rënies së qeverisë komuniste në Moskë. Por ato u tensionuan përsëri vitin e kaluar kur Rusia i shtoi përpjekjet për ndikim në vendet ish komuniste të Europës Lindore dhe dërgoi trupa për të ndërhyrë në Gjeorgji.

Fjalimi i zotit Rasmussen shënon një qasje të re ndaj marrëdhënieve mes Rusisë dhe Perëndimit.

Duke kërkuar marrëdhënie të reja me Rusinë, ai i bëri thirrje Moskës t’i bashkohet koalicionit perëndimor për “presion maksimal” ndaj Iranit që ai të heqë dorë nga ambicjet bërthamore. //ii

XS
SM
MD
LG