Organizata Transparency International thotë në raportin e saj të përvitshëm se Afganistani dhe Iraku, dy vende që marrin miliarda dollarë në ndihma ndërkombëtare, janë mes shteteve më të korruptuara.
Në raport, Somalia radhitet si vendi më i korruptuar në botë. Ai pasohet nga Afganistani, Birmania, si edhe Sudani dhe Iraku të cilët janë në të njëjtin nivel, në vend të katërt. Organizata radhit Zelandën e Re si vendin me më pak korrupsion, pasuar nga Danimarka, si edhe Singapori dhe Suedia.
Transparency International thotë se në përgjithësi lista për nivelin e korrupsionit në vitin 2009, është shumë shqetësuese sepse shumica e 180 vendeve të anketuara ishin radhitur në nivelin nën pesë në një shkallë ku maksimumi i pikëve ishte 10.
Organizata thotë se shtete të brishta dhe të paqëndrueshme të përfshira nga lufta dhe konflikti vazhdojnë të jenë nga më të prekurat nga korrupsioni.