SHBA po i mirëpresin marrëveshjet e dhjetra vendeve për dërgimin e mijëra ushtarëve të tjerë në Afganistan. Sekretarja amerikane Shtetit Hillary Clinton tha se Forca e Ndihmës Ndërkombëtare për Sigurinë po e mbështet strategjinë e paraqitur këtë javë nga Presidenti Obama për Afganistanin.
Zonja Clinton i bëri këto komente sot, në përfundim të takimit të ministrave të jashtëm të NATO-s në Bruksel. Të martën Presidenti Obama premtoi në një fjalim të shumëpritur vendosjen e 30 mijë trupave amerikane shtesë në Afganistan.
Po sot, Sekretari i
Përgjithshëm i NATO-s, Anders Fo Rasmussen bëri të njohur se të paktën
25 vende do të dërgojnë rreth 7 mijë trupa shtesë në Afganistan vitin e
ardhshëm. Kjo shifër e shton me dy mijë vetë numrin e mëparshëm të
forcave shtesë të aleatëve, por diplomatët thonë se Washingtoni u ka
kërkuar vendeve të NATO-s deri në 10 mijë trupa shtesë.
Dy shtetet më
të mëdha evropiane, Gjermania dhe Franca, nuk kanë bërë premtime lidhur
me rritjen e numrit të trupave të tyre në Afganistan. Megjithatë, zoti
Rasmussen tha se parashikon shtimin e numri të trupave në muajt e
ardhshëm.