Kryeministri rus Vladimir Putin tha se planet amerikane për një program mbrojtës nga raketat në Europë janë pengesa kryesore në bisedimet për një traktat të ri mbi kontrollin e armëve.
Zoti Putin tha dje në Vladivostok se sistemi i planifikuar do të prishte baraspeshën e fuqisë pasi Rusia nuk ka plane për mbrojtje nga raketat.
Ai tha se një mburojë amerikane antiraketë do të krijonte një “ombrellë” që do t’i bënin Shtetet e Bashkuara të ndjeheshin tepër të sigurta për të bërë ç’të dëshirojnë.
Zoti Putin tha se Moska po planifikon dislokimin e armëve ofensive për të ruajtur baraspeshën.
Uashingtoni thotë se nuk është dakord me pohimin e zotit Putin se mbrojtja nga raketat dhe armët ofensive janë të lidhura mes tyre.
Një zëdhënës i Departamentit amerikan të Shtetit tha dje se një traktat për kontrollin e armëve ka të bëjë vetëm me armët strategjike ofensive. Ai tha se Shtetet e Bashkuara kanë rënë dakord të bisedojnë me Rusinë për mbrojtjen nga raketat në një tjetër konferencë.//ii