Pakistani thotë se do të vazhdojë t’i bëjë trysni qeverisë Talebane të Afganistanit për të dorëzuar terroristin Osama bin Laden.
Ministri i Brendshëm pakistanez Moinudeen Haider u tha sot gazetarëve në Islamabad se qeveria e tij ka për detyrë të vazhdojë përpjekjet për të bindur Talebanin të përmbushë kërkesat anti-terroriste të komunitetit ndërkombëtar ose përndryshe do të ndeshet me sulme ushtarake të Shteteve të Bashkuara.
Zoti Haider i bëri këto komente një ditë pasi Talebani i tha një grupi klerikësh islamikë që vizituan Afganistanin se nuk do të gjunjëzohej para trysnisë amerikane për të ekstraduar disidentin saudit për gjykim nën akuzat për terrorizëm.
Presidenti Bush e ka identifikuar Osama bin Ladenin si të dyshuarin kryesor për organizimin e akteve terroriste të 11 shtatorit kundër Shteteve të Bashkuara.