Më 26 prill të vitit 1971, një komision i veçantë i rekomandoi presidentit Richard Nixon që Shtetet e Bashkuara duhet të ndërmerrnin hapa për pranimin e Kinës në radhët e OKB-së. Në raportin e shkruar nga ekspertë të politikës së jashtme dhe udhëheqës biznesi thuhej se Shtetet e Bashkuara gjithashtu duhet të ushtronin presion për vazhdimësinë e anëtarësisë së Tajvanit në Kombet e Bashkuara. Më vonë, po në vitin 1971, Asambleja e Përgjithshme e Kombeve të Bashkuara pranoi Republikën Popullore të Kinës si anëtare të OKB-së. Por pavarësisht nga përpjekjet e amerikanëve, ajo e përjashtoi Tajvanin nga radhët e saj. Jo vetëm që Kina Komuniste u pranua në radhët e OKB-së, por asaj ju dha vendi që kishte patur më parë Tajvani në Këshillin e Sigurimit të OKB-së.
Më 26 prill të vitit 1984, muzikanti i madh i xhazit Count Basie vdiq nga kanceri, në moshën 79 vjeçare. William Basie lindi në Red Bank të New Jersey-t, në vitin 1904. Nëna e tij i mësoi t’i bjerë pianos që në moshë të vogël. Në moshën e adoleshnecës, Basie shkoi në New York, ku ai ra në kontakt dhe u influencua nga pianistët e xhazit në Harlem, si James Johnson dhe Fats Waller. Në vitin 1935, kur ai u vu në krye të bandës së Çikagos, një spiker i radios lokale i vuri Basie-t nofkën ”Konti”. Stili i kontit Basie shprehet qartë në një nga intrepretimet e tij më të famshme ”One O’Clock Jump”.Muzika e William Basie-t, i cili vdiq në vitin 1984, pati një ndikim të fuqishëm në gjeneratën e muzikantëve të xhazit që e shoqërojnë këngën me lëvizje ritmike në skenë.