Nënpresidenti i Afganistanit, Haxhi Abdul Kadir, u vra me atentat në Kabul.
Ministri i Brendshëm i Afganistanit, Taxh Mohammed Uardak, tha se zoti Kadir u qëllua sot, pak pas mesditës, ndërsa ndodhej brenda në makinë. Në atentat u vra edhe shoferi i tij.
Dy persona të armatosur qëlluan dhjetra herë kundër makinës, ndërsa zoti Qadir po shkonte për në zyrë. Policia e Kabulit thotë se personat e paidentifikuar u larguan.
Zoti Kadir i përkiste grupit pashtu, grupi më i madh etnik në Afganistan. Ai ishte njeri prej tre nënpresidentëve në qeverinë e përkohshme të drejtuar nga Hamid Karzai dhe po ashtu shërbente si ministër i punëve publike dhe governator i provincës lindore, Nangahar.
Vrasja, që u krye në mes të ditës në Kabul, i jep një goditje të re përpjekjeve të zotit Karzai për të ushtruar autoritetin e qeverisë së tij në gjithë Afganistanin.
Zoti Kadir ishte një drejtues me ndikim i Aleancës së Veriut, e cila organizoi sulmin ndaj Kabulit vitin e kaluar, ndërsa Talebanët po fillonin të humbisnin pushtetin.
Ai ishte vëllai i komandantit të njohur të kryengritësve afganas, Abdul Hak, i cili u kap dhe u ekzekutua nga talebanët vitin e kaluar.