Presidenti i Jugosllavisë, Vojisllav Koshtunica, tha se përpjekjet për hartimin e një kushtetute të re për ristrukturimin e Jugosllavisë janë bllokuar.
Zoti Koshtunica e bëri këtë koment sot, pasi udhëheqës të Serbisë dhe Malit të Zi nuk u paraqitën dje për të marrë pjesë në takimin që ishte parashikuar për këtë çështje.
Kryeministri serb, Zoran Xhinxhiç, dhe homologu i tij malazez, Filip Vujanoviç, e anulluan takimin pasi bënë të njohur një projekt- kushtetutë më të hershme që do të shërbejë për të vënë themelet e një shteti të ri të përbashkët.
Projekt-kushtetuta parashikon një bashkim të lirë të quajtur Serbia dhe Mali i Zi, me presidentin, parlamentin, ushtrinë dhe gjykatat e tij që do të zëvendësonin institucionet e tanishme federale.
Shefi i politikës së jashtme të Bashkimit Evropian, Havier Solana, i cili ndërmjetësoi në bisedimet për arritjen e marrëveshjes, pritet të shkojë këtë javë në Jugosllavi për të ndihmuar në rifillimin e negociatave.