Udhëheqës ndërkombëtarë të financave u dhanë fund bisedimeve dy ditëshe në Uashington, duke bërë thirrje për reforma që do të nxitnin ekonominë e ngadaltë botërore dhe do të lironin nga borxhet vendet në zhvillim.
Në takimin përfundimtar të Bankës Botërore dhe të Fondit Monetar Ndërkombëtar, ministrat e Financave premtuan t’i ndihmojnë vendet në zhvillim që të çlirohen nga barra e borxheve të papërballueshme.
Ata thanë se brenda 6 muajve të ardhshëm do të paraqesin një propozim konkret për një sistem falimentimi.
Po ashtu udhëheqësit financiarë u bënë thirrje vendeve të pasura që të heqin me shpejtësi pengesat tregtare për vendet më të varfëra.
Gjatë takimeve të Bankës Botërore dhe të Fondit Monetar Ndërkombëtar u zhvilluan një sërë demonstratash kundër kapitalizmit global. Sipas burimeve policore protestat ishin kryesisht paqësore dhe më të vogla nga sa pritej. //kk//